ความมีวินัย

        คุณธรรม           ประจ๋ำชีวิต

ฝากเป๋นข้อคิด            เตือนจิตเตือนใจ๋

อย่าได้ละเว้น             ฝึกเป๋นนิสัย

คือเรื่องวินัย               ระเบียบหนอเจ้า

บ่ว่าจะเป๋น                 คนหนุ่มคนเฒ่า

ต้องฝึกตั๋วเฮา             เข้าไว้

         กฎกติกา          ร่างออกมาใจ๊

ก็เพื่อจะได้                 ดูงาม

หากเฮาประพฤติ           ปฏิบัติต๋าม

ย่อมจะเกิดความ           เรียบร้อยทุกด้าน

กฎของโรงเรียน            สังคมหมู่บ้าน

ในที่ทำงาน                  ในวัด

          เฮาต้องฮักษา     วินัยเคร่งครัด

ปฏิบัติถูกต้อง               ต๋ามราย

หากปล่อยเลย              ละอาจจะเสียหาย

เกิดเหตุวุ่นวาย              สับสนป่นปี้

อย่างมาโรงเรียน            แวะหั้นแวะหนี้

กว่าจะถึงที                  สุดซ้อย

         แถมยังแต่งก๋าย   ก็บ่เรียบร้อย

ใส่ตุ้มหูห้อย                 พราวแพรว

เพลงชาติบ่ร้อง             เวลาเข้าแถว

ชอบเอิ้นชอบแซว          เวลาครูอู้

ครูว่าครูเตือน               ก็ซ้ำบ่สู้

แถมเล่าขวัญครู             สั๊พป๊ะ

         ว่าครูลำเอียง       ขี้จ่มพ่องละ

ว่าครูเป๋นบ้า                 สั่งงาน

พักเที่ยงแย่งยื้อ            กั๋นซื้ออาหาร

กระโดดทะยาน             ไปอยู่แถวหน้า

ทั้งทั้งที่ตั๋ว                   มาลูนมาหล้า

แซงหมู่ที่มา                 ก่อนนั้น

       เวลาที่ครูยืน         สอนหน้าจั๊น

ก็ชอบอู้ขั้น                   อู้แซว

พ่องก็จอดรถ                อย่างบ่เป๋นแถว

ต๋ามระเบียบแนว            ที่วางไว้หื้อ

 ผ่อบ่งามต๋า                 แขกมาแอ่วหยื้อ

เปิ้นก็จะลือ                   เล่าฮ้าย

           ขับรถขับรา        แซงขวาแซงซ้าย

บ่สนใจ๋ป้าย                   ห้ามเตือน

ขับขี่ลดเลี้ยว                 ฉวัดเฉวียน

แหกกฎบิดเบือน            อวดเก่งอวดกล้า

ก่ออันตราย                   แก่คนทั่วหน้า

หากพลาดขึ้นมา             แหลกยับ

        บ่เจ็บก็ต๋าย           เสียหายเกิ๋นนับ

เสียทรัพย์เสียด้าน           เวลา

อาจต้องติดคุก               เพราะถูกข้อหา

ประมาทได้นา                 จักปาหม่นไหม้

เหตุร้ายตังหลาย             จักลดลงได้

หากมีวินัย                      พร้อมพรัก

          ก๋ารอยู่ร่วมกั๋น        กับคนหมู่นัก

อย่ามักง่ายต้อง                ระวัง

ขยะ ขี้เฮอะ                      ต้องทิ้งลงถัง

อย่าคว่างรุงรัง                  ต๋ามสนามหญ้า

นอกจากบ่งาม                  ยังทำขายหน้า

กลิ่นเหม็นตวยมา              น่าจ๊ะ

        ก่อหื้อเกิดเป๋น           มลภาวะ

ต่อสิ่งรอบข้าง                   ตวยไป

ขอหื้อเลิกละ                     อุปนิสัย

ที่จะเป๋นภัย                       ต่อไปตางหน้า

อย่ามาเรียนสาย                 เมื่องายเมื่อหล้า

แต่ควรจะมา                      เจ๊าเจ๊า

           จะเข้าห้องเรียน       ต้องถอดรองเท้า

ตรงที่ตางเข้า                     หั้นนา

วางหื้อเรียบร้อย                  ผ่อก็งามต๋า

ยามหายขึ้นมา                    ก็จะฮู้เจ้า

บ่เป๋นปัญหา                       เวลาออกเข้า

สะดวกกับเฮา                     แต๊ตั๊ก

      เรื่องวินัย                    ว่าไปก็นัก

ขอพักเท่าอี้เอวัง     เมื่อได้ฟังเก็บไปคิดหน้อย

จบค่าวจ๊อยก่อนแล นายเฮย….

 

                                                                                                 

สาคร พรมไชยา   บ้านสักสันติราษฎร์

 ต.งิ้ว     อ.เทิง  จ.เชียงราย    โทร. 053-669469   , 086-1896079